2026-njy ýylyň 5-nji martynda Türkmenistanyň Mejlisinde Pakistan Yslam Respublikasynyň zenan parlamentarileri bilen wideoaragatnaşyk arkaly duşuşyk geçirildi. Bu barada edaranyň metbugat gullugy habar berýär.
Söhbetdeşligiň dowamynda taraplar türkmen parlamentiniň düzümi, kanunçykaryjylyk işi we halkara parlamentara guramalary bilen alnyp barylýan hyzmatdaşlyk barada pikir alşyp, parlament diplomatiýasynyň ikitaraplaýyn gatnaşyklardaky möhüm ornuny nygtady.
Pakistanyň wekilleri Türkmenistanyň Mejlisinde zenan wekilleriň görkezijisiniň ýokarydygyny, döwlet dolandyryşynda ýaş zenanlaryň ornuny aýratyn belläp, munuň ýurtda gender deňligini üpjün etmekde gazanylan uly üstünlikdigini kanagatlanma bilen belledi.
Şeýle-de, duşuşykda adam hukuklary, zenanlaryň we çagalaryň hukuklaryny goramak boýunça amala aşyrylýan milli meýilnamalar hem-de bu ugurda BMG bilen alnyp barylýan işjeň gatnaşyklar barada durlup geçildi.
Taraplar parlamentara gatnaşyklaryň netijeliligini ýokarlandyrmak maksady bilen, ýaş we zenan parlamentarileriň arasyndaky duşuşyklary yzygiderli geçirmek barada ylalaşdy.
