Beýik Britaniýada batareýa bilen işleýän ilkinji ýolagçy otlusy ulanmaga berildi

Beýik Britaniýada sap batareýa bilen işleýän ilkinji ýolagçy otlusy ulanmaga berildi. Interesting Engineering neşiriniň habar bermegine görä, otly «Great Western Railway» (GWR) operatorynyň «Greenford» şahasyna yzygiderli gatnawlara başlady.  
230-njy kysymly (№ 230001) otly Londonyň günbatar böleginde «West Ealing — Greenford» ugry boýunça gatnaýar. Ýoluň uzynlygy bir tarapa takmynan 8 km deňdir. 12 minutlyk ýoluň ugrunda dört sany duralga bar.  Birinji tapgyrda otly şenbe günleri dizel ýangyçly düzüme derek işledilýär. Doly şertlerde ulanmak boýunça ýygnalýan maglumatlary seljerip, geljekde otlynyň gatnaw tertibini ýylboýy giňeltmek meýilleşdirilýär.
22 aýlyk synaglaryň dowamynda otly bir gezeklik zarýad bilen geçilýän aralykda 322,6 km ýol geçip, dünýä rekordyny goýdy. Mundan ozalky rekord 2021-nji ýylda Germaniýada hasaba alnyp, ol 223,7 km deň bolupdy.
Zarýad beriş işi «West Ealing» stansiýasyndaky relsiň gysga bölegine gurnalan 2000 kilowatlyk zarýad beriji enjam arkaly amala aşyrylýar. Rels diňe otly onuň üstünde doly duran wagty işe girizilýär. Bu bolsa gatnawlaryň arasyndaky 3,5 minudyň dowamynda doly zarýad almaga mümkinçilik berýär.
«Şowly geçen synaglar batareýa tehnologiýasynyň kontakt ulgamy arkaly elektrikleşdirme işine ygtybarly we netijeli alternatiwa bolup biljekdigini tassyklady» diýip, GWR-iň inženerçilik direktory Saýmon Grin belledi.
Edil şonuň ýaly, «Network Rail-iň» günbatar ugrunyň direktory Markus Jons hem demir ýolunyň ekologik aýratynlyklaryny göz öňünde tutmak bilen, batareýaly otlularyň 2050-nji ýyla çenli zyýanly galyndylary nola düşürmek maksadyna ýetmekde esasy orny eýelejekdigini nygtaýar.