Rimde Trewi çüwdürimine teňňe oklamak tölegli boldy

Rimde Trewi çüwdüriminiň golaýyna barmak üçin töleg girizildi. Indi çüwdürimiň ýakynynda durmak we oňa şaýlyk pul taşlamak isleýän syýahatçylar 2 ýewro tölemeli bolarlar.
Şäher häkimiýetleriniň habar bermegine görä, bu çäre syýahatçylygyň şähere salýan agramyny azaltmaga we taryhy ýadygärligi saklamak üçin serişde toplamaga gönükdirilendir. Guramaçylyk topary täze düzgün her ýyl azyndan 6,5 million ýewro girdeji getirer diýlip çaklaýar. Ýygnalan serişdeleri fontanyň özüni hem-de Italiýanyň paýtagtynyň beýleki arhitektura ýadygärliklerini abat saklamaga sarp etmek meýilleşdirilýär.
Diňe syýahatçylara degişli bolan bu töleg her gün sagat 09:00-dan 21:00-a çenli alynýar. Rimiň ýaşaýjylary, alty ýaşdan kiçi çagalar, maýyplygy bolan adamlar we olary saklaýjylar üçin töleg geçirmek zerurlygyndan boşadylýar. Üstesine-de çüwdürimiň öňündäki meýdança erkin gezelenç üçin açyklygyna galýar. Tölegi diňe çüwdürimiň hut öz ýanyna barmak isleýänler tölemeli.
Trewi çüwdürimi XVIII asyryň ortalarynda gurlupdyr. Ony döretmek boýunça işler takmynan 30 ýyl dowam edip, 1762-nji ýylda tamamlanypdyr. Bu hakyky sungat eseri uly meşhurlyk gazanyp, «baky şäheriň» nyşanlarynyň birine öwrüldi. 2025-nji ýylda bu owadan ýere takmynan 10 million adam geldi.
Mundan ozal Italiýada Rimdäki Panteon, Weronadaky «Julýettanyň howlusy», şeýle-de syýahatçylyk möwsüminde iň ürç edilýän Wenesiýa ýaly birnäçe taryhy ýerlere barmak hem tölegli bolupdy.