Dubaýda (BAE) dünýäde ilkinji gezek doly awtomatlaşdyrylan ulgamlaryň kömegi bilen ýaşaýyş willasy gurlar. Interesting Engineering neşiriniň habar bermegine görä, bu taslama 25-den gowrak tehnologiýa kompaniýasyny we akademiki edarany öz içine alýan halkara konsorsium tarapyndan amala aşyrylýar.
Bu başlangyja Dubaý häkimligi, Zacua Ventures we Würth topary bilelikde gözegçilik ederler. Taslamanyň esasy maksady — hakyky ýaşaýyş standartlaryna laýyk gelýän desgany döretmek üçin tutuş gurluşyk tapgyryny awtomatlaşdyrmakdan ybaratdyr. Guramaçylar robotlaryň gurluşyk meýdançalarynda ulanylmagynyň ykdysady taýdan bähbitlidigini we onuň gerimini giňeltmegiň mümkindigini subut etmegi meýilleşdirýärler.
Taslamanyň başlanýandygy barada Dubaýyň Expo City şäherçesinde ýerleşýän "Gurluşyk innowasiýalary we barlaglary merkezi — 04 ConTech Valley" atly merkeziň açylyşynda mälim edildi. Bu meýdança robotlaşdyrylan gurallary, täze nesil materiallaryny we sanly infrastruktura çözgütlerini synagdan geçirmek üçin niýetlenendir.
Dubaý häkimliginiň baş direktory Marwan Ahmed bin Galita öňdebaryjy tehnologiýalary ornaşdyrmagyň strategik ähmiýetini belledi. Onuň sözlerine görä, awtomatlaşdyrmak pudagyň netijeliligini, durnuklylygyny we uzak möhletleýin ygtybarlylygyny ýokarlandyrmaga ukyplydyr. Edaranyň ýolbaşçysy şeýle hem bu başlangyjyň geljegi uly bolan taslamalaryň başlangyç tapgyrlardan tä täjirçilik maksatly ulanylmagyna çenli geçmegine kömek etjekdigini nygtady.
