12-nji ýanwarda Türkmenistanyň daşary işler ministri Raşid Meredow BMG-niň Baş sekretarynyň Ýörite wekili, BMG-niň Merkezi Aziýa üçin öňüni alyş diplomatiýasy boýunça Sebit merkeziniň ýolbaşçysy Kaha Imnadze bilen duşuşdy.
Duşuşygyň dowamynda taraplar Türkmenistanyň Birleşen Milletler Guramasy bilen strategik hyzmatdaşlygy berkitmäge, şol sanda Türkmenistanyň başlangyjy bilen 2025-nji ýylda BMG-niň Baş Assambleýasy tarapyndan kabul edilen rezolýusiýalarda bellenen maksatlary durmuşa geçirmäge ygrarlydygyny tassykladylar.
Diplomatlar Sebit merkeziniň geçen ýyldaky işiniň netijelerini jemläp, 2026-njy ýyl üçin meýilnamalary we Merkezi Aziýanyň bäş döwletiniň hem gatnaşmagyndaky bilelikdäki taslamalar boýunça alnyp barylýan işleri maslahatlaşdylar.
Gepleşikleriň barşynda Türkmenistanyň Prezidentiniň BMG bilen hyzmatdaşlykda Parahatçylyk we bitaraplyk uniwersitetini döretmek baradaky başlangyjyna aýratyn üns berildi. Bu pikir 2025-nji ýylyň 12-nji dekabrynda Halkara parahatçylyk we ynanyşmak ýylyna, Halkara Bitaraplyk gününe hem-de Türkmenistanyň hemişelik Bitaraplygynyň 30 ýyllygyna bagyşlanyp geçirilen Halkara forumda öňe sürlüpdi.
Bu başlangyç foruma gatnaşyjylaryň ählisi tarapyndan goldanyldy we BMG-niň Baş Assambleýasynyň 80-nji sessiýasynyň resmi resminamasy hökmünde ýaýradylan Aşgabat jarnamasynda öz beýanyny tapdy.
Taraplar bu başlangyjy durmuşa geçirmek boýunça bilelikdäki işleri dowam etdirmek barada ylalaşdylar.
