Alymlar Antarktidanyň Larsen buzluklarynyň aşagyndaky ýerasty derýada, 500 metr çuňlukda öň mälim bolmadyk täze bir ekoulgamy ýüze çykardylar. Bu açyş yklymyň gizlin suw ulgamlaryny we ýerasty derýalaryny öwrenmek üçin geçirilen ylmy işleriň barşynda amala aşyryldy.
Açyş barada Täze Zelandiýanyň Suw we atmosfera barlaglary milli institutynyň (NIWA) alymlary habar berdiler.
Alymlar ägirt uly buz gatlagyny burawlamak üçin gyzgyn suwly ýörite şlangy ulanyp, 500 metrlik guýy burawladylar.
Kamerany çuňluga düşürenlerinde, olar enjam näsazlygydyr öýtdüler. Ýöne fokusy sazlanlaryndan soň, ekranda ýüzlerçe janly organizmiň — amfipodlaryň (leňňeç şekilliler) barlygyny gördüler.
Beýle çuňlukda, doly garaňkylykda we aşa sowuk şertlerde işjeň krewetkalaryň we beýleki janly-jandarlaryň tapylmagy barlagçylary geň galdyrdy.
Mundan beýläkki barlaglar şeýle üzňe (izolirlenen) ulgamlarda iýmit maddalarynyň nähili aýlanýandygyny we ýaşaýşyň nähili dowam edýändigini öwrenmäge gönükdiriler.
Bu açyş Antarktidanyň buz gatlaklarynyň aşagynda özbaşdak işleýän ägirt uly suw we ýaşaýyş torlarynyň bardygyny subut edýär.
"Şeýle gurluşda diri krewetkalaryň we beýleki işjeň haýwanlaryň bolmagy toparyň sözüň doly manysynda begenjinden uçmagyna sebäp boldy" — diýip, barlagçylar bu pursady ýatlaýarlar.
