Türkmenistan 14-nji dekabrda Tähranda Owganystan boýunça geçirilen ýokary derejeli sebit duşuşygyna gatnaşdy. Maslahatyň esasy maksady — ýurtdaky ýagdaýy kadalaşdyrmak üçin sebitara çemeleşmeleri utgaşdyrmakdan ybarat boldy.
Maslahata Owganystanyň goňşy döwletleriniň we sebit hyzmatdaşlarynyň, hususan-da, Eýranyň, Pakistanyň, Russiýanyň, Özbegistanyň, Hytaýyň we Täjigistanyň ýörite wekilleri gatnaşdy. Gatnaşyjylar Owganystanda durnuklylygy üpjün etmekde goňşy döwletleriň esasy ornuny tassykladylar. Şeýle hem durnuklylygyň diňe daşky taraplaryň sebit işlerine gatyşmazlyk şerti bilen mümkindigini nygtadylar.
Taraplar Owganystan bilen söwda-ykdysady gatnaşyklary saklamagyň ähmiýetine ünsi çekdiler. Bu çemeleşme ykdysady ösüşi owgan halkynyň durmuşyny gowulandyrmagyň we sebit integrasiýasynyň esasy faktory hasaplaýan Türkmenistanyň ugruna doly gabat gelýär.
Türkmenistan özüniň bitaraplyk we hoşniýetli goňşuçylyk syýasatynyň çäklerinde owgan halkyna yzygiderli ynsanperwer kömegini bermegiň tarapdary bolup çykyş edýär. Ýurdumyz owgan halkynyň abadançylygyna goşant goşjak düzümleýin taslamalary amala aşyrmaga goldaw bermäge taýýardygyny bildirdi.
Duşuşyga gatnaşyjylar serhetüsti meseleleri çözmekde diplomatik guraly ulanmaga çagyrdylar. Şeýle hem Pakistanyň geljek ýylyň martynda Yslamabatda ýörite wekilleriň ikinji duşuşygyny geçirmäge taýýarlygy gyzgyn garşylandy. Bu duşuşyklar sebitde syýasy durnuklylygy we ykdysady ösüşi üpjün etmek üçin goşny döwletleriň amaly hem-de durnukly strategiýany durmuşa geçirýändigini görkezýär.
