Ýewropa Bileleşigi içinden ýandyrylýan hereketlendirijili täze ulaglary satmaklyga goýlan gadaganlygy yza süýşürmegi meýilleşdirýär. Bu barada "The Times" gazeti öz çeşmelerine salgylanyp habar berýär.
ÝB-ne agza 27 döwlet tarapyndan 2023-nji ýylda gol çekilen ylalaşygyň ilkibaşda 2035-nji ýylda güýje girmegi meýilleşdirilipdi. Emma muňa garamazdan, gadagançylygyň bäş ýyl, 2040-njy ýyla çenli yza süýşürilmegine garaşylýar.
Resmi däl maglumatlara görä, möhleti yza süýşürmek baradaky karar Ýewropanyň iri awtoulag öndürijileriniň we kärdeşler birleşikleriň basyşy astynda kabul edildi. Doly elektrikli ulaglara bolan islegiň ýeterlik derejede ösmeýän awtoulag bazaryndaky häzirki ýagdaý hem goşmaça faktor boldy. Elektrikli awtoulag önümçiligini ösdürmek we işe girizmek ýokary çykdajylar bilen baglanyşykly bolup, bu bolsa kompaniýalary tygşytlamaga we işgärleri köpçülikleýin işden çykarmagyň öňüni almaga mümkinçilik berýän ýollary gözlemäge mejbur edýär.
Täzelenen meýilnamanyň resmi taýdan yglan edilişiniň 17-nji dekabrda bolmagyna garaşylýar. Täzelenen maksatnamada elektrikleşdirilen ulaglara, esasanam, zarýad berilýän gibridlere (plug-in gibridlere) we içinden ýandyrylýan hereketlendirijili diňe energiýa generatory hökmünde ulanýan gibrid güýç gurluşy bolan ulaglara has köp üns berler diýlip garaşylýar. Öň sintetiki ýangyç bilen işleýän hereketlendirijiler üçin kadadan çykma öz güýjünde galýar.
