Italiýanyň aşhana däpleri resmi taýdan ÝUNESKO-nyň Maddy däl medeni mirasynyň sanawyna girizildi. Bu barada Italiýanyň premýer-ministri Jorja Meloni habar berdi.
Çözgüt Nýu-Delide geçirilen sessiýada Maddy däl medeni mirasy goramak boýunça hökümetara komiteti tarapyndan kabul edildi.
«Şu gün ÝUNESKO italýan aşhanasyny bütindünýä mirasynyň obýekti diýip ykrar etdi. Biz aýratynlygymyzy we özboluşlylygymyzy görkezýän bu ykrarnamany alan dünýäde ilkinji ýurt bolduk. Biz italýanlar üçin aşpezlik – bu ýönekeý bir iýmit ýa-da reseptler toplumy däl. Bu has uly zat: bu medeniýet, däp-dessur, zähmet we baýlyk» — diýip, Jorja Meloni belledi.
La Stampa neşiriniň belleýşi ýaly, bu çözgüt üýtgeşik hasaplanýar, çünki häzire çenli sanawa tutuş bir milli aşhana däpleri däl-de, diňe aýry-aýry tagamlar ýa-da reseptler girizilipdi. Komitetiň netijesine görä, italýan aşhana sungaty «biomedeni köpdürlülik bilen durnukly ösüşi» özünde jemleýär.
Italiýa ÝUNESKO-nyň Bütindünýä mirasynyň sanawyna girizilen obýektleriň sany boýunça dünýäde öňdebaryjylygy saklaýar. Ozal maddy däl mirasyň sanawyna «pizzaýolo» hökmünde belli bolan neapolitan pizzasyny taýýarlamagyň usuly goşulypdy.
