Consumer Reports neşiri iň ygtybarly modelleriň täze reýtingini hödürledi. Sanawda yzygider ikinji ýyl Subaru birinji orny eýeledi. Brend Toyota we Honda markalaryndan, şeýle-de BMW we Porsche ýaly premium öndürijilerden öňe geçdi.
Bilermenler ýol synaglarynyň netijelerine, ýakyn ýyllarda döwülmeleriň bolmak ähtimallygyna, howpsuzlyk derejesine we sürüjileriň synlaryna baha berdi. Bu maglumatlar Consumer Reports-yň synagdan geçiren modelleri boýunça ýygnaldy.
Ahyrky sanawda ikinji we üçünji orunlary BMW we Porsche eýeledi. Olaryň yzyndan Honda, Toyota we Lexus gelýär.
Şeýle-de, ilkinji onluga Lincoln, Hyundai, Acura we Tesla girdi. Hasabatda Tesla-nyň ygtybarlylygyň ýokarlanmagy netijesinde ornuny gowulandyrandygy bellenilýär.
Görkezijileriň jemi boýunça 31 brendden ybarat sanawda iň soňky orunlary Jeep we Land Rover eýeledi.
Aýry-aýry modeller deňeşdirilende, ýagdaý üýtgeýär: ygtybarlylyk boýunça birinji orny Toyota eýeleýär, soňra Subaru, Lexus, Honda we BMW gelýär.
Hasabatda hereketlendirijileriň görnüşi boýunça tapawutlar hem görkezilýär. Gibridler benzinde işleýän awtomobiller bilen deňeşdirilende 15% has ygtybarly boldy. Birikdirilýän gibridler we elektromobiller eýelerinden köp şikaýat aldy, ýöne elektromobilleriň arasynda «ortaça we ýokary» ygtybarlylygy görkezen modeller hem peýda bolup başlady.
Gözleg 2000-nji ýyldan 2025-nji ýyl aralygynda çykarylan ulaglaryň, takmynan, 380 müň eýesinden pikir soraşmalara esaslanýar.
