25-nji noýabrda Türkmenistanyň Ýaponiýadaky ilçisi Atadurdy Baýramow Ýaponiýanyň daşary işler ministriniň orunbasary Eri Arfiýa bilen duşuşdy. Bu barada Ýaponiýanyň daşary syýasat edarasynyň web sahypasynda habar berildi.
Söhbetdeşligiň dowamynda ýapon tarapy ikitaraplaýyn gatnaşyklary mundan beýläk-de ösdürmek üçin ýakyn hyzmatdaşlyga taýýardygyny belledi. Ministrlik şu ýylyň aprel aýynda Türkmenistanyň Prezidenti Serdar Berdimuhamedowyň Ýaponiýa saparyny hem ýatlady we Osakada geçirilen EKSPO-2025-däki türkmen pawiliýonynyň işine ýokary baha berdi.
Ilçi A.Baýramow Eri Arfiýany daşary işler ministriniň orunbasary wezipesine bellenmegi bilen gutlap, Türkmenistanyň hyzmatdaşlygy pugtalandyrmagy dowam etdirmäge taýýardygyny tassyklady.
Dialogyň dowamynda taraplar halkara gün tertibini ara alyp maslahatlaşdylar we «Merkezi Aziýa + Ýaponiýa» görnüşindäki sammite taýýarlyk görmek boýunça mundan beýläk-de bilelikde işlemekde özara gyzyklanma bildirdiler.
