Awstraliýanyň gündogaryndaky Murgon şäherinde krokodilleriň ýitip giden toparynyň ýumurtgalarynyň ýurtda iň gadymy bölekleri tapyldy. Tapyndy alymlara bu haýwanlara we olaryň ýaşaýyş gurşawyna has gowy düşünmäge mümkinçilik berer diýip, Täze Günorta Uels uniwersiteti habar berýär.
Mikel Krusafont adyndaky paleontologiýa boýunça Kataloniýa institutynyň ýolbaşçylygyndaky halkara alymlar topary ýumurtga gabyklaryny palçyk çukurda tapdy. Ýumurtga Awstraliýanyň çäginde, takmynan, 55 mln ýyl ozal ýaşan krokodillere – mekozuhinlere degişlidi. Alymlar indi bu krokodilleriň diňe bir özboluşly anatomiýasyny däl, eýsem olaryň köpelmek we üýtgeýän gurşawa uýgunlaşmak usullaryny öwrenip boljakdygyny belleýär.
Süýji suwlarda ýaşaýan häzirki krokodillerden tapawutlylykda, mekozuhinleriň käbirleri gury ýerde aw edipdir, tokaýlarda ýaşapdyr we hatda awlaryna hüjüm etmek üçin agaçlara dyrmaşypdyr. Bu krokodilleriň uzynlygy bäş metre ýetipdir.
Barselona uniwersitetinden ylmy gözlegiň esasy awtory Ksawýer Panades-i-Blas paleontologiýada, köplenç, ýumurtga gabyklaryna ähmiýet berilmeýändigini belleýär.
“Biziň gözleglerimiz bu bölekleriň näderejede gymmatly maglumatlary berip biljekdigini görkezýär. Ýumurtga gabygy paleontologik gözlegleriň adaty bölegi bolmaly – ol süňkler we dişler bilen bir hatarda ýygnalmaly, saklanmaly we seljerilmeli” – diýip, alym belledi.
