Özbegistanly we italiýaly alymlar gadymy gonamçylykda kelleçanagy deşilen bäş ýaşly çaganyň galyndylaryny tapdylar. Barlagçylar bu operasiýany Merkezi Aziýanyň çäginde mälim bolan iň gadymy, şeýle-de tutuş Aziýa boýunça hem örän irki amallaryň biri hasaplaýarlar.
Bu tapyndy takmynan bäş we üç ýaşlaryndaky iki çaganyň bilelikde jaýlanan guburyndan tapyldy. Operasiýa yzlary uly çaganyň kelleçanagynda saklanyp galypdyr.
Barlagçylaryň berýän maglumatlaryna görä, operasiýa süňkden ýa-da daşdan ýasalan gurallaryň kömegi bilen amala aşyrylypdyr. Alymlar şol döwürde lukmançylyk we dini dessurlaryň arasynyň gaty ýakyn bolandygyny, şol sebäpli hem bu emeliň anyk näme maksat bilen edilendiginiň heniz öwrenilýändigini belleýärler.
Arheologik tapyndy Oks siwilizasiýasy (biziň eramyzdan öňki III müňýyllygyň ahyry — II müňýyllygyň başy) bilen baglanyşyklydyr. Bu medeniýet gadymy döwürde Merkezi Aziýanyň çäginde höküm sürüp, öz täsirini hatda Pars aýlagynyň kenarlaryna çenli ýaýratmagy başarypdyr.
Çagalaryň gubury bürünç eýýamynyň Orta Aziýa medeni zolagynyň esasy merkezleriniň biri hasaplanýan gadymy Jarkutan şäherinden tapyldy. Arheologlar ozal hem bu ýerden gadymy şäher binalarynyň galyndylaryny we ýokary hilli keramika önümleriniň nusgalaryny ýüze çykarypdylar.
