Awstraliýanyň Sidneý şäherindäki Täze Günorta Uels uniwersitetiniň hünärmenleri espresso taýýarlaýan täze enjam döretdiler. Bu gurluş gyzgyn suw ulanman, ýörite ultrases gurnamasy tarapyndan döredilýän ýokary ýygylykly yrgyldylaryň hasabyna kofe gaýnadyp bilýär.
Tehnologiýada ilki ýokary ýygylykly tolkunlaryň çeşmesi ýörite deşik arkaly portafiltre birikdirilýär. Ses tolkuny dessine owradylan kofeniň içinden geçip, portafiltriň diwarlaryndan yzyna serpikýär we ekstraksiýa (kofeniň tagamyny we reňkini çykarmak) hadysasy başlanýar.
Bu täze oýlap tapyş, ilkinji nobatda, önümçilik çykdajylaryny azaltmaga çalyşýan kofehanalar we bankadaky kofe içgilerini öndürijiler üçin niýetlenendir:
Elektrik energiýasyny tygşytlamak: Suwy gyzdyrmagyň zerurlygy ýoklugy sebäpli, kofe taýýarlamak işinde elektrik energiýasynyň sarp edilişi takmynan 75 göterim azalýar.
Ýokary tizlik: Tehnologiýa sowuk usulda demlenýän kofeniň (kold-brýu) taýýarlanyş wagtyny bir gije-gündizden bary-ýogy üç minuda çenli gysgaldýar.
Oýlap tapyjylaryň bellemegine görä, ultrasesiň kömegi bilen alnan içgi tagamy we goýulygy boýunça klassik espresso bilen mep-meňzeşdir. Üstesine-de, ol beýleki deregine demlenýän kofelerden (meselem, filtr-kofe) tapawutlylykda, azrak ajy tagama eýedir.
