Türkmenistanyň Söwda-senagat edarasynda «Sanly çözgüt – 2025» bäsleşiginiň ýeňijilerini sylaglamak dabarasy boldy. Bu çäre ýurduň telekommunikasiýa we IT ulgamynda esasy waka bolan «Türkmentel–2025» XVIII Halkara sergisiniň we ylmy maslahatynyň dabaraly ýapylyşynyň çäklerinde geçirildi.
Gatnaşyjylaryň taslamalary birnäçe ölçegler boýunça bahalandyryldy. Olaryň arasynda – ähmiýetliligi, innowasionlygy, ykdysady taýdan netijeliligi, ulanmagyň amatlylygy, dizaýnynyň hili, şeýle hem başlangyç kodunyň bolmagy bar. Bäsleşige işläp düzüjiler we üç adamdan köp bolmadyk toparlar gatnaşdylar.
Ýedi ugur boýunça jemi kyrk iki adam sylaglandy: 7 birinji, 14 ikinji we 21 üçünji orun berildi.
Birinji orunlaryň eýelerine plazma telewizory we noutbuk gowşuryldy. Ikinji orunlary eýelänler noutbuklar bilen, üçünji orunlary eýelänler bolsa planşetler bilen sylaglandylar. Ähli baýrak eýelerine degişli diplomlar gowşuryldy.
