Apple indiki ýyl çykarylmagyna garaşylýan täze iOS 27 operasion ulgamynyň üstünde işleýär. Bloomberg-iň wekili Mark Gurmanyň sözlerine görä, kompaniýa emeli aňy ösdürmek bilen baglanyşykly üç ugra ünsüni jemleýär.
Seljerijiniň sözlerine görä, Siri ses kömekçisiniň täzelenen wersiýasy we beýleki EA gurallary 2026-njy ýylyň mart-aprel aýlarynda goýberilmegi meýilleşdirilýän iOS 26.4-de peýda bolar. iOS 27-niň esasy täzelikleri iýun aýyndaky tanyşdyrylyş dabarasynda görkeziler.
Gurman Apple-iň Siri üçin täzelenen wizual interfeýsi, emeli aň bilen işleýän web gözleg guralyny hem-de ulanyjylara saglygyna gözegçilik etmäge ýardam etjek EA-agenti taýýarlaýandygyny aýtdy.
Täzelenen Health programmasynda saglyk maglumatlaryny seljermek, iýmitlenmek boýunça şahsylaşdyrylan maslahatlary bermek we lukmançylyk bilermenleriniň wideo materiallarynyň ýygyndysyny hödürlemek üçin EA-ny ulanýan Health+ hyzmaty bolar. Ähli funksiýalar Apple Watch-i goşmak bilen, Apple enjamlary bilen üznüksiz işlär.
"Şowly bolan ýagdaýynda bu hyzmat Apple-i EA bilen işleýän saglygy goraýyş çägindäki çat-botlarda özüne çekiji ilkinji tehnologiýa kompaniýalarynyň birine öwrüp biler" – diýip, Gurman Power On kolonkasynda ýazdy.
