Tesla-nyň paýdarlary Maska trillion dollar tölemäge razy boldy

  • 08.11.2025 00:55
  • 5.9k+

Tesla-nyň paýdarlary kompaniýanyň egindeş esaslandyryjysy we baş direktory bolan Ilon Maska 1 trln dollar tölemegi makullady. Ses bermegiň netijeleri Tehasdaky ýyllyk gurultaýda yglan edildi diýip, The Guardian habar berýär.

Paýdarlaryň 75%-den gowragy tölegiň berilmegini goldady. Ýöne Mask bu sylagy almak üçin öňde goýlan maksatlaryň ählisini ýerine ýetirmeli bolar: mysal üçin, 10 ýylda Tesla-nyň robotaksi önümçiligi boýunça işini ösdürmeli we kompaniýanyň bazar bahasyny 1 trln dollarlygyndan azyndan 8,5 trln dollara ýetirmeli.
Şol bir wagtyň özünde, Mask Tesla-nyň ýolbaşçysy wezipesindäki işi üçin zähmet hakyny we bonus almaz. Munuň deregine işewür her bir kesgitlenen maksat üçin kompaniýanyň paýnamalarynyň 1%-ini alar. Ähli maksatlara ýetilen ýagdaýynda Tesla-nyň paýnamalarynyň 12%-i Maskyň elinde bolar. Bu paýnama bukjasynyň bahasy 1 trln dollar diýlip hasaplanýar.
Tesla-nyň müdirler geňeşi höweslendiriş çäreleriniň maýadarlaryň garaşmalaryna laýyk gelýändigini belledi. Maksatlar üstünlikli durmuşa geçirilen ýagdaýynda Mask, takmynan, 2 trln dollar baýlygy bilen dünýäde ilkinji trillioner bolup biler.

“Biziň etjek bolýan zadymyz – bu Tesla-nyň geljeginde diňe bir täze sahypa däl-de, düýbünden täze kitap” – diýip, Mask Ostindäki ýygnakda paýdarlara aýtdy.

Ilon Mask dünýäde iň baý telekeçi hasaplanýar. Oktýabryň başynda ol, Forbes-iň hasaby boýunça, baýlygy 500 mlrd dollara ýeten taryhda ilkinji adam boldy. 


22.11.2025 23:57
1.6k+

Nvidia işgär başyna 4,4 mln dollar, Netflix birneme az gazanýar

Nvidia, Netflix we Apple işgär başyna düşýän girdejiniň ululygy boýunça tehnologiýa kompaniýalarynyň arasynda öňdebaryjylar boldy. Şeýle statistikany OnDeck kompaniýasy hödürledi. Işgär başyna girdeji (RPE) kompaniýanyň işiniň netijeliliginiň giňden ýaýran görkezijisi bolup, işçi güýjüniň öndürijiligine baha bermek üçin ulanylýar...

16.11.2025 20:46
2.2k+

Mask ahyrsoňy Apple we OpenAI bilen bagly işi kazyýete berdi

Apple we OpenAI Ilon Maskyň kompaniýalarynyň (X Corp we xAI) antimonopoliýa arzasyny ýatyryp bilmediler. ABŞ-nyň okrug kazysy Mark Pitman (Mark Pittman) bu baradaky haýyşlary kanagatlandyrmady. Kazynyň bu karary X Corp we xAI kompaniýalaryna Apple we OpenAI-ny "bäsdeşlige garşy dilleşmekde" we bäsdeşler üçin päsgelçilik döretmekde aýyplaýan kazyýet işini dowam etmäge mümkinçilik berdi...

22.10.2025 17:53
14k+

Ilon Mask 1 trln dollar tölemeseler, Tesla-dan gitjekdigini aýtdy

Tesla-nyň ýolbaşçysy Ilon Mask paýdarlar 1 trln dollar möçberde täze öwez bukjasyny tassyklamasa, kompaniýadan gitjekdigini ýaňzytdy. On ýyla niýetlenen täze töleg maksatnamasy üçin paýdarlar indiki aýyň başynda ses berer...

03.10.2025 17:01
8.4k+

Ilon Mask baýlygy ýarym trillion dollara ýeten ilkinji adam boldy

2025-nji ýylyň 1-nji oktýabrynda amerikaly işewür, Tesla we SpaceX kompaniýalarynyň ýolbaşçysy Ilon Mask Forbes žurnalynyň hasaby boýunça baýlygy 500 mlrd dollara ýeten taryhda ilkinji adam boldy. Milliarderler indeksiniň maglumatlaryna görä, milliarderiň baýlygy bu görkezijä Tesla-nyň paýnamalarynyň 4% ýokarlanmagy netijesinde ABŞ-nyň gündogar wagty bilen 15:30-da (Aşgabat wagty bilen 00:30) ýetdi...