Kazyýet Ilon Maskyň OpenAI kompaniýasyna we onuň esaslandyryjylaryndan biri bolan Sem Altmana garşy bildiren "kezzapçylyk" aýyplamalaryny ret etdi, emma beýleki aýyplamalar boýunça derňew işleri dowam eder. Bu baradaky çözgüdi ABŞ-nyň Kaliforniýa ştatynyň Okland şäherindäki okrug kazyýetiniň kazysy Iwonn Gonsales Rodjers kabul etdi.
Şol bir wagtyň özünde, kazyýet Maskyň haýyr-sahawat ynamyny bozmak we esassyz baýlaşmak baradaky talaplaryna seretmegi meýilleşdirýär.
Kazyýetde oturdaşlary saýlamak işi duşenbe güni başlamaly, sişenbe güni, 28-nji aprelde bolsa taraplaryň giriş sözlerine garaşylýar.
Maskyň bellemegine görä, talaplaryň bir böleginiň ret edilmegi işiň barşyny ýeňilleşdirer we esasy maksada — "OpenAI-yň baýlyk toplamak üçin maşyn däl-de, adamzada peýda getirýän gurama bolmagyny üpjün etmäge" ünsi jemlemäge mümkinçilik berer.
Işiň düýp mazmuny Maskyň OpenAI, Altman we kompaniýanyň iň iri maýadarlarynyň biri bolan Microsoft-yň ony we jemgyýetçiligi aldandygy baradaky aýyplamalaryna esaslanýar. Maskyň aýtmagyna görä, olar 2019-njy ýylda Mask OpenAI-yň direktorlar geňeşinden çykandan soň, täjirçilik guramasyny döredipdirler.
Reuters agentliginiň berýän maglumatyna görä, OpenAI kompaniýany 1 trillion dollar möçberinde bahalandyryp biljek IPO-a (aksiýalaryň ilkinji gezek satuwa çykarylmagyna) taýýarlanýar. Çeşmäniň habar bermegine görä, Mask 150 milliard dollar möçberinde öwez tölegini talap edýär we bu serişdeleri OpenAI-yň haýyr-sahawat bölümine gönükdirmegi meýilleşdirýär.
