Aşgabatda BMG-niň Ösüş maksatnamasynyň (BMGÖM) Türkmenistandaky täze taslamasy — «Biodürlüligi maliýeleşdirmegiň meýilnamalaryny taýýarlamagy goldamak boýunça toplumlaýyn maksatnama» boýunça giriş seminary geçirildi.
Taslama BMGÖM tarapyndan Türkmenistanyň Daşky gurşawy goramak ministrligi bilen bilelikde, Global ekologik gaznasynyň (GEF) maliýe goldawy bilen amala aşyrylýar. Taslamanyň esasy maksady — ýurduň Biodürlüligi maliýeleşdirmegiň milli meýilnamasyny işläp taýýarlamagyna we durmuşa geçirmegine ýardam etmekdir. Bu meýilnama global bioähmiýetli ekoulgamlary goramak boýunça Kunmin — Monreal global çarçuwasy we Biologik dürlülik barada konwensiýa boýunça halkara maksatlara laýyk gelýär.
Çäräniň dowamynda gatnaşyjylar Türkmenistanyň tebigaty goramak ulgamyndaky ileri tutulýan ugurlaryny, maliýeleşdiriş boýunça zerurlyklary we döwlet hem-de hususy serişdeleri çekmek mümkinçiliklerini ara alyp maslahatlaşdylar. Şeýle hem, tebigaty goramak taslamalarynyň maliýe ýetmezçiligini azaltmak maksady bilen innowasion çözgütleri ulanmaga aýratyn üns berildi.
BMGÖM-niň belleýşi ýaly, BMGÖM/GEF maksatnamasy dürli ýurtlarda durmuşa geçirilýär we ekologiýa ähmiýetli başlangyçlaryň durnukly maliýeleşdirilmegini güýçlendirmäge, döwlet ösüş strategiýalaryna tebigy serişdeleri goramagyň ugurlaryny goşmaga we «ýaşyl» maliýe gurallaryny ösdürmäge ýardam edýär.
