Türkmenistanyň Aragatnaşyk ministrliginde IT-tehnologiýalaryny, emeli aňy we robot tehnikasyny ösdürmäge gönükdirilen innowasion bäsleşik — «Sanly çözgüt–2025» boýunça saýlama tapgyry geçirilýär.
Bäsleşik ýedi ugurda geçiriler:
- emeli aň
- robot tehnika we awtomatlaşdyrma
- «akylly» oba hojalyk tehnologiýalary
- akylly şäher konsepsiýalary
- sanly lukmançylyk
- elektron bilim
- hyzmatlar ulgamynyň sanlylaşdyrylmagy .
Hödürlenen işler köptaraplaýyn ölçegler boýunça bahalandyrylýar. Şol ölçeglere çözgüdiň döwrüň talaplaryna laýyklygy, innowasion häsiýeti, ykdysady netijeliligi, ulanyş amatlylygy, dizaýn hil derejesi, kanunçylyk bilen laýyklygy, pikiriň özboluşlylygy, programma üpjünçiliginiň başlangyç kodunyň bardygy girýär.
Ýeňijileri sylaglamak dabarasy 2025-nji ýylyň 12–14-nji noýabry aralygynda Aşgabatda Türkmenistanyň Söwda-senagat edarasynyň binasynda geçiriljek «Turkmentel–2025» halkara sergisiniň we ylmy maslahatynyň çäklerinde bolar.
Guramaçylar bäsleşigiň diňe bir geljegi uly sanly taslamalary ýüze çykarmaga däl-de, eýsem işewürlik gatnaşyklaryny ýola goýmaga, başlangyç taslamalary (startaplary) işe girizmäge, innowasiýalary halk hojalygynda we jemgyýetçilik ulgamynda amaly taýdan durmuşa geçirmäge ýardam berýändigini nygtaýarlar. Iň gowy taslamalaryň ornaşdyrylmagy we giňeldilmegi üçin goldaw alar. Bu bolsa bäsleşigi ýurdumyzyň sanly ekoulgamyny ösdürmekde we maglumat-kommunikasiýa tehnologiýalar ulgamynda täze hünärmenleri taýýarlamakda möhüm platforma hökmünde öňe çykarýar.
