8-nji oktýabrda Türkmenistanyň daşary işler ministri Raşid Meredow ýurdumyzda özüniň diplomatik işini tamamlaýan Katar Döwletiniň Adatdan daşary we Doly ygtyýarly ilçisi Hamad bin Raşid bin Hamad Al-Azbi bilen duşuşdy.
Bu barada Türkmenistanyň DIM-niň metbugat gullugynyň habar bermegine görä, ilçi Türkmenistanyň ýolbaşçylaryna diplomatik wezipesini durmuşa geçirmekde beren hemmetaraplaýyn goldawy hem-de degişli ýardamlary üçin türkmen tarapyna özüniň minnetdarlygyny bildirdi.
Söhbetdeşligiň barşynda söwda-ykdysady ulgamdaky gatnaşyklaryň ösdürilmegine gyzyklanma bildirildi. Şunuň bilen baglylykda, Söwda-ykdysady hyzmatdaşlyk boýunça türkmen-katar hökümetara toparynyň aýratyn ornuny bellemek bilen, onuň nobatdaky mejlisiniň geçirilmegine pudagara derejesinde görülýän taýýarlyk işleri hem agzaldy.
Diplomatlar iki ýurduň hem medeni-ynsanperwer ugurdaky gatnaşyklary mundan beýläk-de pugtalandyrmaga ygrarlydyklaryny tassykladylar.
Duşuşygyň ahyrynda türkmen tarapy ilçä türkmen-katar gatnaşyklarynyň ösdürilmegine goşan şahsy goşandy üçin hoşallyk bildirdi we onuň geljekki işinde üstünlikleri arzuw etdi.
