Hytaýly ummany öwrenijiler Arktikanyň buzunyň aşagynda ilkinji adam tarapyndan dolandyrylýan çuňluga çümmek işini geçirdiler. Geçen hepde tamamlanan ekspedisiýa polýar ekoulgamynyň ýagdaýy barada täze maglumatlary berdi diýip, Interesting Engineering ýazýar.
Üç aýlap “Sýuelun-2” buz döwüji gämisiniň ýolbaşçylygyndaky ylmy flotiliýa Demirgazyk Buzly ummanyň barmasy kyn ýerlerinde barlaglary geçirdi. Yzygider geçirilen suwa çümmek işleriniň dowamynda döwrebaplaşdyrylan “Szýaolun” batiskafy aşa pes temperatura şertlerinde rekord çuňluga ýetdi.
Alymlar ilkinji gezek galyň buzuň aşagynda adam tarapyndan dolandyrylýan we pilotsyz apparatyň işini üstünlikli utgaşdyrdylar. Taslamanyň tehniki müdiriniň sözlerine görä, sähelçe ýalňyşlyk aragatnaşygyň kesilmegine sebäp bolup bilerdi.
Ekspedisiýa ozal mälim bolmadyk çuň deňiz jandarlaryny goşmak bilen, 183 sany biologiki nusgany ýygnady. Umman düýbündäki çökündiler müňýyllyklaryň dowamynda howanyň üýtgemegini öwrenmekde aýratyn ähmiýete eýedir .
Ylmy toparyň wekili adaty trallama usullarynyň deňziň näzik jandarlaryny gorap saklamaga mümkinçilik bermeýändigini aýtdy. Maglumatlary gaýtadan işlemek üçin emeli aňy we ekologiki DNK-seljermesini ulandylar, bu görnüşleri kesgitlemegi çaltlaşdyrmaga mümkinçilik berdi.
Ýygnalan materiallar Hytaýyň barlag merkezlerine geçirildi. Barlagçylar täze maglumatlaryň global maýlamaklygyň Arktikanyň ekoulgamyna edýän täsirini çaklamaga kömek eder diýip umyt bildirýärler.
