Germaniýa Federatiw Respublikasynyň professor-lukmanlary Türkmenistana iş saparynyň çäklerinde ýerli hünärmenler bilen öz tejribelerini paýlaşýarlar. Olar paýtagtymyzdaky we Arkadag şäherindäki saglyk merkezlerinde bolup, bilelikde näsaglaryň saglygyny bejermek işlerine gatnaşýarlar.
Germaniýa Federatiw Respublikasynyň Augsburg uniwersitet klinikasynyň fizioterapewt-reabilitolog hünärmeni Elwira Weber hem-de bu ýurduň Ulm uniwersitet klinikasynyň fizioterapewt-reabilitolog hünärmeni Stewen Reinbold Aşgabadyň 400 orunlyk Halkara sagaldyş-dikeldiş merkezinde türkmen kärdeşleri bilen näsaglara bellenilýän dikeldiş bejergileriniň meýilnamasyny işläp düzmek, daýanç-hereket kesellerini bejermek ugrunda bilelikde iş alyp barýarlar.
Saglygy goraýyş boýunça halkara hyzmatdaşlygyň çäklerinde Germaniýanyň Haýdelberg uniwersitet klinikasynyň we Gamburg uniwersitet klinikasynyň transplantolog we nefrolog lukmanlary Arkadag şäheriniň köpugurly hassahanasynda bolup, ýerli lukmanlar bilen bilelikde böwrek transplantasiýasy operasiýasyny amala aşyrdylar. Şeýle hem daşary ýurtly hünärmenler döwrebap şäheriň «Tiz kömek» merkezinde bolup, bu ýerde işleriň guralyşy bilen ýakyndan tanyşdylar we özleriniň tejribelerini paýlaşdylar.
Germaniýanyň Mýunhen şäheriniň Dogabitdi ýürek hirurgiýasy we çaga ýürek hirurgiýasy hassahanasynyň professor-lukmanlary paýtagtymyzdaky Halkara saglyk merkezleri müdiriýetiniň Halkara kardiologiýa merkezinde ýerli lukmanlar bilen bilelikde ýüreginde ýetmezçilik bolan çagalara dürli operasiýalary geçirýärler. Myhmanlar şeýle hem Enäniň we çaganyň saglygyny goraýyş ylmy-kliniki merkezinde-de bolup, bu ýerde çaganyň irki ösüşi we irki goşulyşma bölüminiň işi bilen ýakyndan tanyşdylar hem-de merkeziň lukmanlary bilen tejribelerini paýlaşdylar.
— Biz Aşgabada ýylda iki gezek iş sapary bilen gelýäris. Her gezek, adatça, bir hepdäniň dowamynda ýerli lukmanlar bilen 12 töweregi çaga operasiýa bejergilerini geçirýäris. Şular ýaly döwrebap, ähli mümkinçilikleri bolan hassahanada türkmen kärdeşlerimiz bilen tejribämi paýlaşýandygyma we operasiýalara gatnaşyp, adamlara kömek edýändigime örän şatdyryn — diýip, Germaniýanyň Mýunhen şäheriniň Dogabitdi ýürek hirurgiýasy we çaga ýürek hirurgiýasy hassahanasynyň müdiri, baş lukman, professor Jürgen Hörer aýtdy.
Germaniýaly lukmanlar ýurdumyzyň saglyk merkezlerinde işleriň ýola goýluşy we alnyp barlyşy bilen ýakyndan tanşyp, ýerli lukmanlaryň hünär derejesine ýokary baha berdiler.
