2025-nji ýylyň 1-nji oktýabrynda amerikaly işewür, Tesla we SpaceX kompaniýalarynyň ýolbaşçysy Ilon Mask Forbes žurnalynyň hasaby boýunça baýlygy 500 mlrd dollara ýeten taryhda ilkinji adam boldy.
Milliarderler indeksiniň maglumatlaryna görä, milliarderiň baýlygy bu görkezijä Tesla-nyň paýnamalarynyň 4% ýokarlanmagy netijesinde ABŞ-nyň gündogar wagty bilen 15:30-da (Aşgabat wagty bilen 00:30) ýetdi. Soňrak Maskyň baýlygy sähel – 499,1 mlrd dollara çenli azaldy.
Bloomberg agentligi onuň baýlygyny 470 mlrd dollar diýip hasaplaýar.
Bloomberg-iň we Forbes-iň, degişlilikde, hasaplamalary boýunça, Mask dünýäniň iň baý adamlarynyň sanawyndaky ikinji adamdan – Oracle-yň egindeş esaslandyryjysy Larri Ellisondan 120 ýa-da 150 mlrd dollar öňde barýar.
Ilon Mask Tesla-nyň 191 mlrd dollarlyk 12% paýnamasyna, SpaceX-iň 168 mlrd dollarlyk 42% paýnamasyna we xAI Holdings-iň 60 mlrd dollarlyk 53% paýnamasyna eýeçilik edýär.
Soňky bäş ýylda Maskyň baýlygy 20 esseden gowrak ýokarlandy. 2020-nji ýylyň martynda Forbes onuň baýlygyny 24,6 mlrd dollar diýip hasaplapdy, eýýäm şol ýylyň awgustyna çenli ol Tesla-nyň paýnamalarynyň gymmatlamagy netijesinde 100 mlrd dollardan geçdi. 2021-nji ýylyň sentýabryna çenli onuň baýlygy 200 mlrd dollardan, 2021-nji ýylyň noýabryna çenli 300 mlrd dollardan, 2024-nji ýylyň dekabryna çenli bolsa 400 mlrd dollardan geçdi.
Informa Connect Academy analitiki topary 2024-nji ýylyň sentýabrynda Maskyň eýýäm 2027-nji ýyla çenli bir trln dollar baýlygy bolan ilkinji adam bolup biljekdigini çaklady.
