30-njy sentýabrda Türkmenistanyň Daşary işler ministrliginiň Halkara gatnaşyklary institutynda «Halkara hyzmatdaşlyk: parahatçylygy we durnukly ösüşi berkitmegiň kepili» atly maslahat geçirildi. Bu barada Türkmenistanyň DIM-nde habar berdiler.
Maslahata wise-premýer, daşary işler ministri R.Meredow, ýurduň daşary syýasat edarasynyň ýolbaşçylary we işgärleri, Türkmenistanda akkreditirlenen diplomatik wekilhanalaryň we halkara guramalarynyň ýolbaşçylary hem-de wekilleri, institutyň professor-mugallymlary we talyplary, şeýle hem ýerli köpçülikleýin habar beriş serişdeleriniň wekilleri gatnaşdylar.
Maslahatda giriş sözi bilen Türkmenistanyň DIM-niň Halkara gatnaşyklary institutynyň rektory Gülşat Ýusupowa çykyş edip, ony alyp bardy.
Çäräniň dowamynda wise-premýer R.Meredow, BMG-niň Merkezi Aziýa boýunça öňüni alyş diplomatiýasy boýunça Sebit merkeziniň ýolbaşçysy K.Imnadze, BMG-niň Ösüş maksatnamasynyň Türkmenistandaky Hemişelik wekili N.Saakýan, ÝUNISEF-iň Türkmenistandaky wekili J.Ratna, şeýle hem Azerbaýjanyň ilçisi G.Gozalow, Gazagystanyň ilçisi N.Nogaýew, Gyrgyz Respublikasynyň ilçisi A.Madmarow, Täjigistanyň ilçisi W.Niýatbekzoda we Özbegistanyň ilçisi R.Alimow çykyş etdiler.
Maslahatda «Geljegiň Paktyny» durmuşa geçirilmegiň meselelerine aýratyn üns berlip, Türkmenistanyň BMG-niň Baş Assambleýasynyň 80-nji mejlisinde beýan eden ileri tutulýan garaýyşlarynyň onuň maksatlaryna we ýörelgelerine doly kybap gelýändigi nygtaldy. Şunuň bilen baglylykda, R.Meredow halkara hukugyny berkitmek boýunça ýurdumyzyň başlangyçlaryna, şol sanda 2028-nji ýyly «Halkara hukugyň ýyly» diýip yglan etmek baradaky teklibe hem-de dünýäde howpsuzlygy we durnukly ösüşi üpjün etmekde bitaraplygyň we öňüni alyş diplomatiýasynyň gurallaryny giňden ulanmagyň ähmiýetine aýratyn üns çekdi.
Maslahatda çykyş edenler Türkmenistanyň Prezidenti Serdar Berdimuhamedowyň BMG-niň Baş Assambleýasynyň 80-nji sessiýasynda öňe süren başlangyçlaryň häzirki zaman sebit we ählumumy hyzmatdaşlygynyň gün tertibini kemala getirýändigini bellediler.
Maslahatyň ahyrynda oňa gatnaşyjylar Türkmenistanyň Prezidenti Serdar Berdimuhamedowyň adyna Ýüzlenme kabul etdiler.
