Sýurih uniwersitetiniň gadymy taryh professory Feliks K.Maýer bilen programmist Filipp Ştrebel bilelikde emeli aň esasynda işleýän täze surat generatoryny döredýärler. Ol gural Gadymy Rim we Gadymy Gresiýa döwründen taryhy taýdan hakykata ýakyn sahnalary şekillendirmäge ukyply bolar.
Taslama Re-Experiencing History («Taryhy gaýtadan başdan geçirmek») adyny aldy. Model ylmy edebiýatlaryň hem-de gadymy çeşmeleriň esasynda taýýarlanypdyr. Alymlar şol maksat bilen bir wagtyň özünde üç dürli surat generatoryny ulanýarlar, bu bolsa häzirki giňden ýaýran AI ulgamlarynda duş gelýän käbir ýalňyşlyklardan gaça durmaga ýardam edýär.
Taslamanyň maksady taryhy has aýdyň görkezmek we gyzykly görnüşde ýetirmekdir. Ulanyjylar kitapdaky şekilleriň ýa-da filmlerdäki kadrlaryň ýerine, ýörite taýýarlanan AI modelleri we ýönekeý interfeýs arkaly özleriniň islendik taryhy sahnany janlandyryp bilerler.
Barlagçylar antik döwrüň islendik ýagdaýyny diýen ýaly gaýtadan şekillendirip, ony «başdan geçirmegiň» taryhy kontekste has gowy düşünmäge we geçmişe gyzyklanmany artdyrmaga mümkinçilik berýändigini nygtaýarlar.
Häzirki wagtda ulgam diňe Sýurih uniwersitetiniň talyplary we işgärleri üçin elýeterli, ýakyn wagtda bolsa ony giň jemgyýetçilik üçin açmak meýilleşdirilýär.
