Argentinanyň günortasynda paleontologlar güýçli öňki elleri we uzyn dyrnaklary bolan öň näbelli ýyrtyjy dinozawryň galyndylaryny ýüze çykardylar. Bu tapyndy megaraptor nesliniň Günorta Amerikada uzak wagtlap ýaşandygyny tassyklaýar diýip, Nature Communications žurnalynda bellenýär.
Täze dinozawra Joaquinraptor casali ady berildi. Ol takmynan 66–70 mln ýyl mundan ozal, Krid döwrüniň ahyrynda ýaşapdyr. Uzynlygy 7 metrden geçip, beýikligi 3 metre golaý bolupdyr, agramy bolsa 1 tonna ýetipdir. Galyndylaryň arasynda onuň soňky ýesiriniň — heniz näbelli görnüşdäki gadymy krokodiliň galyndylary hem tapyldy.
Gazuw-agtaryş işleri argentinaly we amerikaly alymlar topary tarapyndan, Patagoniýanyň geologiýa we paleontologiýa institutynyň wekili Lusio Ibirigiň ýolbaşçylygynda geçirildi. Alymlar bu dinozawry iň giç döwrüň megaraptory hökmünde häsiýetlendirdiler.
Megaraptorlar beýleki iki aýakly ýyrtyjy teropodlardan tapawutlanýarlar, bu bolsa olaryň ewolýusiýa agajyndaky ornuna degişli jedelleri döredýär. Joaquinraptor casali-nyň galyndylary bolsa bu ýyrtyjylaryň Günorta Amerikanň günortasynda mezozoý döwrüniň soňuna çenli iýmit zynjyrynyň ýokarsynda galandygyny we beýleki ýyrtyjylar bilen bäsleşmek üçin aýratyn uýgunlaşmalara eýedigini görkezýär.
