ABŞ-nyň sekiz sany iň uly tehnologiýa kompaniýalarynyň umumy bahasy 21 trln dollardan geçdi. Nvidia-nyň paýnamalarynyň pese gaçandygyna garamazdan, bir hepdede olaryň bazar bahasy 420 mlrd dollar ýokarlandy. Indi bu kompaniýalar S&P 500 indeksiniň, takmynan, 36%-ini emele getirýär diýip, CNBC habar berýär.
Iň uly ösüşi Alphabet-iň gymmatly kagyzlary görkezdi, olar Google bilen bagly kazyýet çözgüdinden soň 9% ýokarlandy. Oňa Chrome brauzerini satmazlyga we Apple bilen şertnamany ýatyrmazlyga rugsat berildi. Şonuň üçin bir hepdede Alphabet-iň paýnamalary 10%-den gowrak, Apple-iň kagyzlary 3,2% ýokarlandy, bu hem Nasdaq indeksiniň 1,1% ösmegine goşant goşdy.
Şol bir wagtyň özünde, Ýewropada gözleg ulgamyna mahabat tehnologiýalarynda agdyklyk ediji ornundan hyýanatçylykly peýdalanandygy üçin 2,95 mlrd ýewro jerime salyndy.
Broadcom kompaniýasy EA gurşawynda täze, eýýäm dördünji müşderi bilen 10 mlrd dollarlyk şertnama barada habar berdi. KHBS-iň pikiriçe, bu OpenAI bolup biler. Şondan soň kompaniýa “trillionerleriň klubuna” goşuldy: onuň kapitalizasiýasy 1,6 trln dollara ýetdi.
Nvidia bir hepdede 4% ýitirdi, Microsoft bolsa soňky 12 aýdaky ösüşe garamazdan, yzygider bäşinji hepde pese gaçýar.
Tesla-nyň paýnamalary baş direktor Ilon Mask üçin täze töleg meýilnamasy yglan edilenden soň 5% gymmatlady. Ol kompaniýanyň bazar bahasy 2 trln dollara ýeten ýagdaýynda 1 trln dollara çenli sylag bermegi göz öňünde tutýar.
