Ilon Maskyň xAI kompaniýasy tötänleýin ýüzlerçe müň ulanyjynyň Grok çat-boty bilen ýazyşan söhbetlerini açyk elýeterlilige hödürledi. Köp ulanyjylar öz söhbetdeşliginiň köpçülige ýaýrap biljekdigini bilmeýärdi diýip, Forbes žurnaly habar berdi.
Çat-bot bilen gürrüňdeşlikleri Google, Bing we DuckDuckGo gözleg ulgamlarynda tapyp bolýar.
Neşiriň maglumatlaryna görä, syzma “Paýlaşmak” düwmesi bilen baglanyşykly. Ulanyjylar öz söhbetdeşligi üçin ssylkalary poçta ýa-da messenjerler arkaly paýlaşan bolsa, bu sahypalar gözleg ulgamlaryna düşüp bilýär.
Google-da Grok bilen 370 müňden gowrak söhbetdeşlik ýüze çykaryldy. Olaryň arasynda şahsy we emosional maglumatlar, lukmançylyk maglumatlary, ýüklenen resminamalar, suratlar we azyndan bir parol bardy.
Şol bir wagtyň özünde, X sosial ulgamyny ulanyjylar 2025-nji ýylyň ýanwarynda Google-yň Grok-da hat alyşmalary indeksleýändigini ýazypdy.
xAI-de Forbes-iň ýüzlenmesine jogap berilmedi.
Awgust aýynda şeýle mesele ChatGPT-de hem ýüze çykypdy. Gözleg ulgamynda ulanyjylaryň paýlaşan gürrüňdeşlikleri peýda boldy. KHBS-de ýaýrandan soň, OpenAI kompaniýasy funksiýany öçürip, onuň synag režiminde işländigini we “kontentiň tötänleýin ýaýramagy üçin has köp mümkinçilik döredendigini” aýtdy. Şol gün Ilon Mask bu ýagdaýa seslenip, X sosial ulgamynda “Grok üstün gelýär” diýip ýazdy. Grok akkaunty şol wagt onuň şeýle funksiýasynyň ýokdugyny aýdypdy.
