Özbegistanyň Ministrler Kabineti «Emeli aň ulgamynda iň gowy startap» adyny almak ugrundaky her ýylky «President AI Award» bäsleşigini geçirmegiň resminamasyny tassyklady.
Işi dolandyrmak üçin döwlete degişli bolmadyk täjirçilik däl «Emeli aň alýansy» guramasy döredildi. Ol taslamalary utgaşdyrmak, ylmy jemgyýetçilik, telekeçilik bilen döwletiň arasyndaky özara gatnaşyklary ýola goýmak, şeýle hem EA tehnologiýalaryny öňe sürmek bilen meşgullanar. Bäsleşigiň esasy wezipeleri şulardan ybaratdyr:
Ykdysadyýetiň pudaklaryny ösdürmek üçin geljegi uly bolan EA taslamalaryny hem-de telekiçilik teklipleri gözlemek we goldamak. Munda esasan eksport mümkinçiligi bolan, halkara derejesinde bäsleşige ukyply çözgütlere aýratyn üns berler.
Ýaş hünärmenlerde modelirleme, maglumatlar bilen işlemek we EA-nyň esasynda önümleri toparlaýyn işläp taýýarlamak boýunça amaly endikleri ösdürmek.
Bäsleşik bäş sany esasy ugur boýunça geçiriler, olaryň düzümini guramaçylyk komiteti her ýylyň 1-nji iýunyna çenli tassyklamaga borçludyr. Gatnaşmak üçin arzalar iýul aýynda kabul edilip başlar.
Ýeňijilere GT Park Ventures wençur kompaniýasynyň aksiýalary görnüşinde maýa goýumlary berler. Birinji orun üçin 100 müň dollar, ikinji orun üçin 60 müň dollar, üçünji orun üçin bolsa 40 müň dollar göz öňünde tutulandyr.
