Özbegistanda kino pudagyny we döredijilik ulgamyny goldamagyň täze çäreleri durmuşa geçirilýär. Şolaryň hatarynda hususy teatrlara, kinematografiýa pudagyna hem-de daşary ýurt kompaniýalarynyň ýurduň çäginde kino önümçiligi bilen bagly amala aşyrýan işlerine salgyt ýeňillikleri giriziler.
Döwlet sargydy boýunça surata düşürilýän filmleriň býujetiniň 30 göterimine çenlisi onuň mahabatlandyrylmagyna we tanyşdyrylyşyna sarp ediler. Döredijilik toparlary hem-de prodýuserler bolsa kassa girdejileriniň ýarysyny alyp bilerler.
«Altyn humo» milli kino baýragyny ösdürmek üçin her ýyl 5 milliard sum (takmynan 416 müň dollar) serişde bölüp bermek meýilleşdirilýär. Özbegistanyň Prezidenti Şawkat Mirziýoew Kinematografiýa boýunça respublika komissiýasynyň, şeýle hem Milli we Çeperçilik geňeşleriniň ýatyrylandygyny yglan etdi. Onuň aýtmagyna görä, bu karar pudakda döredijilik erkinligini giňeltmäge we sagdyn bäsdeşligi ösdürmäge gönükdirilendir.
Ýatyrylan düzümleriň deregine her bir žanr we mowzuk ugurlary boýunça degişli hünärmenlerden ybarat bolan bilermenler toparlary dörediler. Olaryň düzümi Kinematografiýaçylaryň döredijilik birleşiginiň, Ýazyjylar birleşiginiň we Kompozitorlar birleşiginiň maslahaty esasynda kesgitlener.
Şonuň bilen bir hatarda, ýurduň ýolbaşçylary degişli ugurlar boýunça halkara kino platformalary we daşary ýurtly hyzmatdaşlar bilen gatnaşyklary giňeltmegi-de maksat edinýärler.
