«Oýnawaçlaryň hekaýaty-5» animasiýa filmi premýeradan öňki görkezilişlerde kassa ýygymlary boýunça 2026-njy ýylyň iň gowy netijesini görkezdi. Bu animasion taslama 17,5 million dollar gazandy diýip, «Variety» neşiri habar berýär.
Multfilm mundan öňki lider bolan we deslapky seanslarda 12,6 million dollar girdeji ýygnan «Maýkl» biografik filminden öňe geçmegi başardy.
Mundan başga-da, oýnawaçlaryň täze başdangeçirmeleri bu görkeziji boýunça animasiýa taryhynda ikinji orny eýeledi we diňe 2018-nji ýylda 18,5 million dollar ýygnan «Super maşgala-2» (The Incredibles 2) multfilminden yza galdy.
Analitikleriň çaklamalaryna görä, ilkinji dynç günlerinde multfilmiň 145 milliondan 150 million dollara çenli girdeji ýygnamagyna garaşylýar. Şol bir wagtda bilermenleriň iň ýokary çaklamalary 160–175 million dollar derejesine ýetýär.
Multfilmiň resmi relizi 19-njy iýunda boldy. Täze bölümde eýýäm belli personažlar — Wudi, Bazz, Jessi we olaryň dostlary özleri üçin üýtgeşik bolan bäsdeş, ýagny döwrebap «LilyPad» planşeti bilen ýüzbe-ýüz bolýar.
