«Ýura eýýamynyň dünýäsi: Hökmürowanlyk» (Мир Юрского периода: Господство) filmi taryhda iň gymmat düşen kino taslamasy diýlip yglan edildi. «Fortune» neşiriniň maglumatlaryna görä, Universal Pictures kompaniýasy bu filmiň önümçiligine 658,8 million dollar serişde sarp etdi.
Bu ekran eseri «Ýura eýýamynyň dünýäsi» seriýasynyň üçünji bölegi boldy. Baş keşpleri Kris Pratt, Braýs Dallas Howard, Lora Dern we Sem Nil ýerine ýetirdi. Filmiň düşüriliş işleri 2020-nji ýylda, COVID-19 pandemiýasynyň güýçlenen döwründe geçipdi, bu ýagdaý hem çykdajylaryň ep-esli artmagyna getirdi.
Kinokompaniýa goşmaça gorag çärelerini ornaşdyrmaga, önümçiligiň uzak wagtlap yza süýşürilmegi sebäpli dörän ýitgileri tölemäge, meýdançalaryň we enjamlaryň kärendesini uzaltmaga, şeýle-de aktýorlara we işçi toparyna berilýän tölegleri saklap galmaga mejbur boldy. Taslamanyň gatnaşyjylary üçin filmiň düşürilýän ýerleriniň golaýyndaky myhmanhanalarda uzak möhletli ýaşaýyş şertleri guraldy.
Gijikdirmeler sebäpli filmiň premýerasy bir ýyl yza süýşürilip, 2022-nji ýylda görkezildi. Dünýä prokatynyň jemleri boýunça «Ýura eýýamynyň dünýäsi: Hökmürowanlyk» filmi 1,004 milliard dollar girdeji gazandy we öz býujetini zordan ödedi.
Mundan öňki rekord «Ýyldyz söweşleri: Güýjüň oýanmagy» (Звездные войны: Пробуждение силы) filmine degişli bolup, onuň onümçiligine 638,9 million dollar sarp edilipdi.
