Seçenow uniwersitetiniň hünärmenleri probiotiklerden we prebiotiklerden düzülen çeýnelýän sakgyç döretdiler. Uniwersitetiň metbugat gullugynyň habaryna görä, täze önüme «Reteriks» diýlip at berildi. Onuň maksady – kariýesiň, gingiwitiň we beýleki stomatologik keselleriň töwekgelçiligini azaltmakdyr.
«Diş lukmançylygy, farmasiýa we menejment ugrundan okaýan talyplaryň köpugurly topary ylmy-amaly tejribe çäginde innowasion çeýnelýän sakgyjy – “Reteriksi” döretdi. Onuň özboluşlylygy - düzüminde probiotikler we prebiotikler bar. Bu önüm diňe bir agyz boşlugynyň gündelik idegi üçin däl, eýsem, mikrobal deňagramlylygy kadalaşdyrmak arkaly stomatologik kesellerden netijeli goramak üçin hem niýetlenendir» diýip, metbugat gullugynda bellenildi.
«Birek-biregi tanamaýan adamlar bary-ýogy 10 sapakda diňe bir özboluşly önümleriň konsepsiýasyny taýýarlap, olary esaslandyrmak bilen çäklenmän, eýsem, olary Seçenow uniwersitetiniň Farmasiýa institutynyň tejribehana önümçiliginde öz elleri bilen döretdiler. Muny olar diňe biziň konstruktiv tankydymyza daýanyp, özbaşdak amala aşyrdylar» diýip, E.W.Borowskiý adyndaky Stomatologiýa institutynyň direktorynyň okuw we terbiýeçilik işleri boýunça orunbasary Anna Turkina talyplar bilen hyzmatdaşlygyň ähmiýetini nygtady.
Önümi döretmek birnäçe tapgyrdan geçdi: ingredientler hakykatda agramlanyp, garyldy, soňra massa ýörite galyplarda basylyp sakgyç görnüşine getirildi, taýýarlanan sakgyçlar gaplanyp, tagamlary boýunça tertiplendi. Awtorlaryň bellemegine görä, talyplar sakgyjyň ýumşak dokumasy we meşhur brendleriň önümlerine deňeçer gelýän hil derejesini gazanmaga çalşypdyrlar.
