BMG-niň Baş Assambleýasynyň 79-njy mejlisiniň başlygy Filemon Ýang BMG-niň Deňze çykalgasy bolmadyk döwletler boýunça üçünji maslahatynyň ýokary derejede guralandygy hem-de myhmansöýer kabul edilendigi üçin Türkmenistanyň ýolbaşçylaryna we halkyna minnetdarlyk bildirdi.
Ol çykyşynda Türkmenistanyň BMG-niň Baş Assambleýasyndaky aýratyn ornuna we sebitleýin hem-de ählumumy parahatçylygy, durnukly ösüşi pugtalandyrmakdaky goşandyna ýokary baha berdi.
Filemon Ýang, şeýle-de, türkmen halkynyň Milli Lideriniň öňe süren “Parahatçylyk ugrunda dialog” başlangyjynyň öz wagtynda öňe sürlen we öňdengörüjilikli teklipdigini belledi. Ol bu başlangyjy köptaraplaýyn hyzmatdaşlygy we öňüni alyş diplomatiýany ösdürmek üçin möhüm ädim hökmünde häsiýetlendirdi.
Maslahatyň çäginde Awaza Hereketleriň Onýyllyk Maksatnamasy hödürlenildi. Bu maksatnama — dünýäde 570 milliondan gowrak ilaty bolan deňze çykalgasy bolmadyk döwletleriň durnukly ösüşini çaltlandyrmaga we ýaşaýyş derejesini ýokarlandyrmaga gönükdirilen toplumlaýyn meýilnama bolup durýar.
— Deňze çykalgasy bolmadyk ýurtlary gury ýollar bilen birikdirilen ýurtlara öwürmek diňe şol döwletleriň işi bolman, eýsem halkara jemgyýetçiliginiň umumy jogapkärçiligidir — diýip, BMG-niň Baş Assambleýasynyň başlygy belledi.
Maslahata 30-dan gowrak döwletiň we halkara guramalaryň wekilleri gatnaşýar.
