4-nji awgustda Türkmenistanyň daşary işler ministriniň orunbasary Ahmet Gurbanow BMG-niň Baş sekretaryň kömekçisi, BMG-niň Ösüş Maksatnamasynyň (BMGÖM) Dolandyryjysynyň kömekçisi we Ýewropa we GDA üçin sebitleýin býurosynyň direktory Iwana Žiwkowiç bilen duşuşdy.
Türkmenistanyň DIM-niň habar bermegine görä, duşuşygyň çäginde Türkmenistan bilen BMGÖM-niň arasyndaky hyzmatdaşlygyň ileri tutulýan ugurlary, şol sanda durnukly ösüş, sanly öwrülişik, ykdysady durnuklylyk, inklýuziw ösüş we howanyň üýtgemegine uýgunlaşmak ýaly meseleler ara alnyp maslahatlaşyldy. Durnukly ösüş maksatlaryna (DÖM) ýetmek üçin milli tagallalary goldamakda BMGÖM-niň ähmiýetine aýratyn üns berildi.
Iwana Ziwkowiç hyzmatdaşlygy dowam etdirmäge we sebitleriň durnukly ösüşine gönükdirilen bilelikdäki başlangyçlary durmuşa geçirmäge BMGÖM-iň ygrarlylygyny beýan etdi, şeýle hem BMG-niň Deňze çykalgasy bolmadyk ösüp barýan ýurtlar boýunça üçünji maslahatyň (LLDC 3) üstünlikli geçirilmegini arzuw etdi.
