Hazaryň türkmen kenaryndaky "Awaza" milli syýahatçylyk zolagy BMG-niň Deňze çykalgasy bolmadyk ösüp barýan ýurtlar boýunça üçünji maslahatynyň (LLDC3) myhmanlaryny kabul etmegini dowam edýär. Foruma BMG-niň agza döwletleriniň ýokary wezipeli wekilleri, halkara guramalarynyň hem-de işewür toparlaryň wekilleri gatnaşýarlar.
Maslahata gatnaşmak üçin ýurdumyza eýýäm Ermenistanyň Prezidenti Waagn Haçaturýan, Nepalyň Premýer-ministri Khadga Prasad Şarma Oli, Ugandanyň Premýer-ministri Robina Nabbanja, Malawiniň wise-prezidenti Maýkl Bizwik Usi, San-Tome we Prinsipiniň Prezidenti Karluş Manuel Wila Nowa, şeýle hem Mongoliýanyň Premýer-ministriniň birinji orunbasary, ykdysadyýet we ösüş ministri Nýam-Osoryn Uçral geldi. Myhmanlary Türkmenbaşy Halkara howa menzilinde ýurdumyzyň resmi wekilleri garşylaýarlar.
On ýyldan bir gezek geçirilýän bu maslahat öňki maksatnamalaryň netijelerini jemlemäge we deňze çykalgasy bolmadyk ýurtlaryň ösüşi üçin täze ugurlary kesgitlemäge gönükdirilendir. Maslahatyň Gün tertibinde halkara hyzmatdaşlygyny pugtalandyrmak, ulag baglanyşyklaryny ösdürmek, söwda amallaryny ýönekeýleşdirmek, ykdysady transformasiýa, howanyň üýtgemegine durnuklylyk we Durnukly ösüş maksatlaryny öňe sürmek ýaly meseleler bar.
Maslahatda sanly integrasiýany giňeltmek, logistika we geografik çäklendirmeleri ýeňip geçmek meselelerine aýratyn üns berler. Ara alyp maslahatlaşmalaryň merkezinde 2034-nji ýyla çenli niýetlenen Hereketleriň Awaza Maksatnamasy durýar.
Bu ugurdaky öňki maslahatlar 2003-nji ýylda Almatyda we 2014-nji ýylda Wenada geçirildi. Bu maslahata gatnaşýan döwletleriň umumy sany 32-ä deň.
