3-nji awgustda Nepalyň Premýer-ministri Şarma Oli Türkmenistana sapar bilen geler. Ol Türkmenistanda geçiriljek BMG-niň Deňze çykalgasy bolmadyk ösüp barýan ýurtlar boýunça üçünji maslahatyna gatnaşjak nepal wekiliýetine ýolbaşçylyk eder. Bu barada Nepalyň Daşary işler ministrliginiň metbugat gullugy habar berdi.
Premýer-ministr Şarma Oli maslahata gatnaşmak üçin Türkmenistanyň Prezidenti Serdar Berdimuhamedow we BMG-niň Baş sekretary Antoniu Guterriş tarapyndan resmi çakylyk aldy diýlip, habarda bellenilýär.
Nepalyň Premýer-ministriniň maslahatda çykyş etmegi hem göz öňünde tutulýar.
Mundan başga-da, maslahat döwründe Şarma Oli dürli ýurtlaryň wekiliýetleriniň ýolbaşçylary we BMG-niň hem-de beýleki halkara guramalaryň ýokary derejeli wekilleri bilen duşuşyklary geçirer.
Türkmenistanda saparda boljak wekiliýetiň düzüminden Premýer-ministriň ýanýoldaşy Radhika Şakýa, Premýer-ministriň baş geňeşçisi Bişnu Prasad Rimal, Federal Parlamentiň agzasy Surýa Bahadur Tapa Kşetri we beýleki ýokary derejeli döwlet resmileri hem orun alar.
Premýer-ministr Şarma Oli 8-nji awgustda Nepala dolanar.
