Fransiýada arka tarapy ýelekpisint gurluşly gadymy süýrenijileriň galyndylary tapyldy. Tapyndynyň ýaşy 247 million ýyl diýip, Ştutgartdaky (Germaniýa) Döwlet tebigat ylymlary muzeýiniň metbugat gullugy habar berdi.
Galyndylar 1930-njy ýyllaryň ahyryndan bäri Elzasdaky Trias eýýamynyň ýataklaryny öwrenýän fransuz kolleksioneri we höwesjeň paleontolog Lui Graufogeliň ýygyndysyndan tapyldy. Birnäçe ýyl mundan ozal onuň gyzy tapyndylary Ştutgart muzeýine tabşyrypdyr, şol ýerde-de olar jikme-jik öwrenildi.
Alymlar drepanozaur pisintlilere degişli ownuk Mirasaura grauvogeli süýrenijisiniň bedeniniň yzlaryny tapdylar. Jandaryň arkasy ýeleklere meňzeýän ösüntgiler bilen örtülen. Olaryň gurluşy mikroskoplar we ESRF bölejik tizlendirijisi arkaly öwrenildi. Bu ösüntgiler gurluş taýdan hakyky ýeleklerden tapawutlanýar.
Tapyndy çylşyrymly deri örtükleriniň ilkinji ýelekli dinozawrlardan we süýdemdirijileriň ata-babalaryndan has ir peýda bolandygyny görkezýän ilkinji subutnamadyr.
