2025-nji ýylyň 12-nji martynda Ahal welaýatynyň Bäherden etrabynda açylan Bäherden keramika önümleri kärhanasynyň önümleri ilkinji gezek Arkadag şäheriniň gurluşygynda ulanylar. Bu barada degişli teklibi 26-njy iýulda Türkmenistanyň Halk Maslahatynyň Başlygynyň Arkadag şäherine iş sapary wagtynda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow beýan etdi.
Türkmen halkynyň Milli Lideri Arkadag şäheriniň gurluşyklarynda ýurdumyzyň kärhanalarynyň önümleriniň we serişdeleriniň ulanylýandygyna hem-de daşary döwletlerden getirilýän harytlaryň ornuny tutýan önümçilik kuwwatlyklarynyň yzygiderli döredilýändigine ünsi çekip, şunda Bäherden keramiki önümler kärhanasynyň önümlerini yzygiderli ulanmak barada karara gelendigini aýtdy. Şäher gurluşygynda ulanyljak üçek örtükleri, ýol betonlary, keramika önümleri we beýleki gurluşyk serişdeleri ýokary hilli, göze gelüwli bolmalydyr. Olaryň howa şertlerine çydamlylygy, berkligi aýratyn üns merkezinde saklanylmalydyr.
Bäherden keramika önümleri kärhanasy ýylda 3 million 300 müň inedördül metr keramiki-bezeg plitalaryny we 120 müň sany sanfaýans önümlerini öndürmäge niýetlenendir.
