Aşgabatda Türkmenistanyň daşary işler ministriniň orunbasary Ahmet Gurbanow bilen Owganystanyň ýurdumyzdaky ilçisi Fazl Mohammad Saberiň duşuşygy boldy. Bu barada Bakhtar news agentligi Owganystanyň Aşgabatdaky diplomatik wekilhanasyna salgylanyp habar berýär.
Duşuşykda ikitaraplaýyn hyzmatdaşlygyň giň ugurlary ara alnyp maslahatlaşyldy. Esasy üns iki ýurduň syýasy, ykdysady we strategik gatnaşyklarynyň berkidilmegine gönükdirildi.
Gepleşikleriň möhüm temalary hökmünde TOPH (Türkmenistan – Owganystan – Pakistan – Hindistan) gaz geçirijisiniň taslamasynyň amala aşyrylmagy, şeýle hem TOP (Türkmenistan – Owganystan – Pakistan) başlangyjynyň ösdürilmegi, şol sanda elektrik geçiriji ulgamlaryň we optiki süýümli aragatnaşyk ulgamlarynyň gurulmagy ara alnyp maslahatlaşyldy. Gatnaşyjylar TOPH-nyň sebitiň energetiki howpsuzlygy we ykdysady ösüşi üçin strategik ähmiýetini belläp geçdiler. TOP taslamasynyň amala aşyrylmagy bolsa sebitiň infrastruktura integrasiýasyny güýçlendirmäge hyzmat etmeli.
Mundan başga-da, Türkmenistan bilen Owganystanyň arasynda demir ýol gatnawynyň we logistika ugurlarynyň giňeldilmeginiň mümkinçilikleri ara alnyp maslahatlaşyldy. Taraplar özara söwdanyň artdyrylmagyna gyzyklanma bildirdiler.
Türkmenistanyň çäginde ýaşaýan owgan raýatlaryna hyzmatlaryň edilmegi bilen bagly meselelere aýratyn üns berildi.
