16-njy iýulda Wellingtondaky Hökümet binasynda Täze Zelandiýanyň general-gubernatory Sindi Kironyň adyna ynanç hatlarynyň gowşurylyş dabarasy geçirildi. Dabaranyň çäginde Türkmenistanyň Täze Zelandiýadaky taryhda ilkinji Adatdan daşary we Doly ygtyýarly ilçisi Atadurdy Baýramow resmi taýdan akkreditasiýa edildi.
Ilçiniň bellenilmegi Türkmenistanyň daşary ýurtlardaky diplomatik wekilçilikleriniň giňeldilmegine gönükdirilen syýasatynyň çäklerinde amala aşyryldy. Ilçini bellemek hakyndaky Perman Türkmenistanyň Prezidenti tarapyndan 2025-nji ýylyň 27-nji aprelinde gol çekildi. Resminama laýyklykda, Türkmenistanyň Ýaponiýadaky (Tokio şäherindäki) ilçisi Atadurdy Baýramow şol bir wagtda Täze Zelandiýada hem ilçi wezipesine bellendi.
Şol gün Täze Zelandiýanyň general-gubernatoryna Polşanyň, Türkiýäniň ilçileri, şeýle hem Solomon adalarynyň we Maldiwleriň ýokary komissarlary ynanç hatlaryny gowşurdylar. Türkmenistan Täze Zelandiýada ilkinji gezek resmi taýdan wekilçilik edýän ýurtlaryň biri boldy. Şeýle ýurtlaryň hatarynda Mikroneziýanyň Federatiw Ştatlary hem bar.
Dabara milli medeni däpler bilen baýlaşdyryldy. Türkmen diplomaty maoriler halkynyň milli dessury bolan “hongi” – alnyň hem-de burnuň degmegi arkaly "jan howasynyň" alşylmagyny alamatlandyrýan däp boýunça garşy alyş dabarasyna gatnaşdy. Bu däbe gatnaşmak medeni köpdürlüligiň we milli däplere hormatyň nyşany hökmünde aýratyn ähmiýete eýe boldy.
