Türkmenistanyň Rumyniýadaky ilçihanasy 9-njy iýulda Ploeşti şäheriniň Medeniýet merkezinde Prahowo etrabynyň Söwda-senagat edarasynyň guramagynda geçirilen Aziýanyň medeniýetiniň festiwalyna gatnaşdy. Türkmenistanyň DIM-niň habar bermegine görä, festiwala şeýle hem Bangladeşiň, Hindistanyň, Indoneziýanyň, Malaýziýanyň, Şri-Lankanyň, Ýaponiýanyň, Koreýa Respublikasynyň we Filippinleriň Rumyniýadaky ilçihanalary gatnaşdy.
Çärä ýerli häkimiýetleriň wekilleri, diplomatik wekilhanalaryň ýolbaşçylary, jemgyýetçilik işgärleri, Prahowanyň ýaşaýjylary we KHBS-iň wekilleri gatnaşdylar.
Açylyş dabarasynyň çäginde öz çykyşlarynda Prahowo etrabynyň Söwda-senagat edarasynyň Prezidenti Aurelian Gogulesku we gatnaşyjylar medeni dialogyň hem-de halkara hyzmatdaşlygyň ähmiýetini bellediler.
Şeýle hem medeni mirasynyň baýlygyny we etnik köpdürlüligini görkezýän Aziýa ýurtlarynyň milli eşikleriniň görkezilişi geçirildi.
Festiwalyň dowamynda ilçiler bilen Prahowanyň administrasiýasynyň wekilleriniň arasynda duşuşyk geçirilip, ikitaraplaýyn gatnaşyklary hem-de sebitleýin hyzmatdaşlygy ösdürmegiň ähmiýeti nygtaldy.
Medeni sergide türkmen tarapy däp bolan egin-eşikleri, senetçilik sungatynyň nusgalaryny, halylary, saz gurallaryny, Magtymguly Pyragynyň eserlerini, şeýle hem Türkmenistanyň Prezidenti Serdar Berdimuhamedowyň we Türkmenistanyň Halk Maslahatynyň Başlygy Gurbanguly Berdimuhamedowyň kitaplaryny hödürledi.
Çäräniň jemleýji tapgyry gatnaşyjy ýurtlaryň aşpezlik däpleri bilen tanyşlyk bilen tamamlandy.
