X (öňki Twitter) sosial ulgamynyň baş direktory Linda Ýakkarino kompaniýadan gidýändigini habar berdi.
“Men iki ýyldan soň X-iň baş direktory wezipesinden gitmek kararyna geldim. Haçan-da biz Ilon Mask bilen ilkinji gezek X-iň geljegi barada gürrüňdeş bolanymyzda, men munuň kompaniýanyň ajaýyp missiýasyny durmuşa geçirmek üçin gowy mümkinçilik boljakdygyna düşündim. Men oňa söz azatlygynyň goragyny, kompaniýany üýtgetmegi we X-i hemmetaraplaýyn programma öwürmegi ynanandygy üçin çäksiz minnetdar” – diýip, Ýakkarino X-de ýazdy.
Ol wezipeden gitmeginiň sebäbini aýtmady.
Ýakkarino Maskyň teklibi bilen 2023-nji ýylyň iýunynda kompaniýa ýolbaşçy boldy. Mundan öň NBCUniversal-da mahabat satuwyna ýolbaşçylyk etdi. Eýeleýän wezipesine garamazdan, esasy çözgütleri müdirler geňeşiniň başlygy bolan Mask kabul edýärdi.
Twitter-i satyn alandan soň, Mask rebrending geçirip, birnäçe üýtgeşmeleri teklip etdi. Şol sebäpli platforma ençeme gezek tankyda sezewar edildi. Ýakkarino ahyryna çenli mahabat berijileriň we ulanyjylaryň öňünde Masky goldady diýip, The New York Times ýazýar.
Onuň gitmegi sebäpli wideobloger MrBeast (hakyky ady – Jimmi Donaldson) garaşylmadyk ýagdaýda sosial ulgama ýolbaşçy bolmak isleýändigini aýtdy.
Ol X-de Ýakkarinonyň işden gitmegi baradaky habara teswir berip, “Bu ýeri men eýelärin” diýip ýazdy.
MrBeast YouTube-de iň meşhur bloger we üçünji iň meşhur TikTok ulanyjysydyr.
Bloger öz sosial ulgamyna ýolbaşçylyk etmek islegi barada birinji gezek aýtmady. Ýanwarda ol TikTok-y satyn almaga we ony ABŞ-da petiklenmekden halas etmäge taýýardygyny mälim etdi. Soňra ol degişli postdan soň özi bilen birnäçe milliarderiň habarlaşandygyny aýtdy.
