Britaniýanyň Kardiff şäherindäki Trelaý seýilgähiniň aşagyndan meýletinçi arheologlar bürünç eýýamynyň mazaryny tapdylar. Tapyndylar takmynan b.e. öňki 1500-nji ýylda gurlan tegelek jaýyň gapdalyndan tapyldy. Bu bina bu ýerden iki ýyl ozal gazylyp tapylypdy.
Hünärmenleriň pikirine görä, mazaryň jaýa golaý bolmagy bu ýeriň gadymy ýaşaýjylar üçin "aýratyn ähmiýete eýe bolandygyny" görkezýär. Megerem, bu ýerde bir maşgalanyň agzalary jaýlanan bolsa gerek.
Bu iş häzirki wagtda täze tapyndylaryň ähmiýetini kesgitlemäge synanyşýan “Kerrounyň we Eliniň mirasynyň dikeldilmegi (Caerau and Ely Rediscovering (CAER) Heritage Project) taslamasynyň bir bölegidir. Olar arheologik zolagyň ozal çak edilişinden has uly bolup biljekdigine ynanýarlar.
Trelaý seýilgähi gezelenç etmek, sport bilen meşgullanmak we itleri gezdirmek üçin meşhur ýerdir. Ol milli ähmiýetli medeni mirasyň desgasy bolan Kerau şäher harabaçylygyndan ýarym mil uzaklykda ýerleşýär. Ozal ol ýerden neolit döwrüniň, demir asyryň, rim we orta asyr eýýamlarynyň artefaktlary tapylypdy.
CAER taslamasy Kardiff uniwersiteti, Action in Caerau and Ely (ACE) jemgyýetçilik guramasy, ýerli mekdepler, ýaşaýjylar we mirasy goramak ulgamyndaky hyzmatdaşlar bilen bilelikde amala aşyrylýar. Häzir seýilgähde arheologik barlaglaryň dördünji tapgyry gidip dur.
