Arkadag şäheriniň 2 ýyllygy mynasybetli şäheriň aragatnaşyk we internet ulgamyna ýokary tizlikli 5G (5ji) tehnologiýasyny ornaşdyrmak boýunça degişli taýýarlyk işleri geçirildi. Bu barada 28-nji iýunda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow Halk Maslahatynyň Başlygy Gurbanguly Berdimuhamedowa hasabat berdi.
D.Orazow bu ýerde ozal hereket edýän 4G+ tehnologiýasynyň ornuna täze, häzirki zaman 5G tehnologiýasyny ornaşdyrmaga ak pata bermegini Gurbanguly Berdimuhamedowdan haýyş etdi.
Bellenilişi ýaly, 5G tehnologiýasy aragatnaşygyň simsiz görnüşiniň bäşinji nesli hasaplanylýar. Ol ýokary tizlik derejesine we ägirt uly geçirijilik ukybyna eýedir. Şeýle hem onuň tizlik derejesi öňkä garanyňda 20 esse ýokarydyr.
Türkmenistanyň Halk Maslahatynyň Başlygy täze şäheriň iki ýyllygy mynasybetli aragatnaşyk we internet ulgamynda 5G tehnologiýasyny işe girizmäge ak pata berdi. Munuň özi “akylly” şäher konsepsiýasy esasynda bina edilen şäheriň hukuk derejesine kybap gelýän çözgütdir. Bu tehnologiýa onlaýn maslahatlaryny geçirmekde, emeli aň mümkinçiliklerini ýola goýmakda, saglygy goraýyş ulgamynda bejeriş işleri geçirilýän pursatlarda maglumat alyşmak wagtyny tizleşdirmekde ähmiýetlidir.
Şunuň bilen baglylykda, Gurbanguly Berdimuhamedow ähli meýilleşdirilen işleriň ýokary derejede we kesgitlenen möhletlerde ýerine ýetirilmelidigini belledi we bu babatda birnäçe görkezmeleri berdi.
