16-njy iýunda Sloweniýanyň Türkmenistanda täze bellenen Adatdan daşary we Doly ygtyýarly ilçisi hanym Alenka Suhadolnik Türkmenistanyň Mejlisiniň Başlygy D.Gulmanowa ynanç hatyny gowşurdy. Bu barada milli parlamentiň metbugat gullugy habar berýär.
Duşuşygyň dowamynda ilçi ýurdumyzyň içeri we daşary syýasatynyň ileri tutulýan ugurlary, milli parlamentiň düzümi, kanunçylygy döwrebaplaşdyrmak boýunça alyp barýan köpugurly işleri bilen tanyşdyryldy.
Taraplar iki ýurduň arasyndaky syýasy-diplomatik gatnaşyklaryň häzirki derejesi, parahatçylygy ilerletmek, ýurtlaryň we halklaryň arasyndaky ynanyşmagy berkitmek, hoşniýetli hyzmatdaşlygyň gerimini giňeltmek işlerinde tagallalary birleşdirmegiň ähmiýeti barada pikir alyşdylar.
Ilçi Alenka Suhadolnik özara hormat goýmak, ynanyşmak ýörelgelerine esaslanýan döwletara dialogy giňeltmek üçin ähli tagallalary etjekdigi baradaky ynandyrmalaryny beýan etdi.
Şu gün, ilçi şeýle hem Türkmenistanyň daşary işler ministriniň orunbasary Mähri Bäşimowa bilen duşuşyp, ynanç hatlarynyň nusgalaryny gowşurdy..
Ilçi diplomatik işini Moskwa şäherinde oturýan ýerinden alyp barar.
