6-njy iýunda Türkmenistanyň daşary işler ministri Raşid Meredow Merkezi Aziýa ýurtlarynyň daşary işler ministrleriniň Hindistanyň Premýer-ministri Narendra Modi bilen bilelikdäki duşuşygyna gatnaşdy.
Türkmenistanyň DIM-niň habar bermegine görä, duşuşygyň dowamynda Raşid Meredow Türkmenistanyň Prezidentiniň hem-de Türkmenistanyň Halk Maslahatynyň Başlygynyň adyndan Premýer-ministr Narendra Modi üçin gutlaglaryny we iň gowy arzuwlaryny ýetirdi.
Duşuşykda söwda-ykdysady hyzmatdaşlygy giňeltmegiň, maýa goýumlaryň möçberini artdyrmagyň hem-de ulag, energetika, senagat, ýokary tehnologiýalar, saglygy goraýyş we farmasewtika ugurlaryndaky bilelikdäki taslamalary durmuşa geçirmegiň mümkinçilikleri ara alnyp maslahatlaşyldy.
TOPH halkara gaz geçirijisiniň gurluşygynyň strategik ähmiýeti aýratyn nygtaldy hem-de bu taslamanyň durmuşa geçirilmegine täze itergi bermegiň zerurdygy bellenildi.
Şeýle hem Türkmenistanyň we Hindistanyň esasy ulag merkezleriniň Ýakyn Gündogar, Hazar sebitine we Ýewropa çykalgasynyň döredilmeginiň halkara logistiki hyzmatdaşlygynyň ösüşinde möhüm orun eýelejekdigi nygtaldy. Bu ugurda Demirgazyk-Günorta halkara ulag geçelgesiniň mümkinçiliklerine aýratyn üns berilýär.
Duşuşygyň jemleri boýunça Türkmenistan bilen Hindistanyň arasyndaky syýasy-diplomatik gatnaşyklary ösdürmäge taýýardygy, söwda-ykdysady hyzmatdaşlygy we ynsanperwer alyş-çalşyklary pugtalandyrmaga gyzyklanmasy tassyklanyldy.
