5-nji iýunda Türkmenistanyň daşary işler ministri Raşid Meredow Nýu-Delide geçirilen «Merkezi Aziýa – Hindistan» Işewürlik geňeşiniň mejlisine gatnaşdy.
Mejlisiň barşynda sebit ýurtlarynyň hem-de Hindistanyň arasynda ulag-logistika ulgamynda özara baglanyşyklylygy ösdürmek, sanly ykdysadyýet we maýa goýum hyzmatdaşlygyny giňeltmek meseleleri ara alnyp maslahatlaşyldy.
Raşid Meredow çykyşynda Işewürlik geňeşiniň hyzmatdaşlygy ösdürmekde netijeli meýdança hökmünde aýratyn ähmiýetini belläp geçdi hem-de onuň mümkinçilikleriniň has giňden peýdalanylmagynyň zerurdygyny nygtady. Esasy taslamalaryň hatarynda TOPH halkara gaz geçirijisiniň gurluşygynyň ähmiýeti aýratyn bellenildi.
Şeýle hem demirgazyk – günorta ugry boýunça ulag geçelgelerini ösdürmek bilen bagly taslamalara maýa goýum mümkinçilikleri aýratyn ara alnyp maslahatlaşyldy.
Taraplar ýokary tehnologiýalar, emeli aň, sanly platformalary döretmek ugurlarynda Hindistan bilen innowasiýa hyzmatdaşlygyny giňeltmäge gyzyklanma bildirýändiklerini beýan etdiler.
Geňeşiň netijeleri boýunça oňa gatnaşyjylar geljekde hem özara bähbitli hyzmatdaşlygyň dürli ugurlary boýunça netijeli gatnaşyklary ösdürmäge taýýardyklaryny tassykladylar.
