Maks Plank Jemgyýetiniň Garramagyň biologiýasy institutynda (Germaniýa) syçanlarda birnäçe synag geçirip gördüler. Barlagçylar rapamisin bilen trametinibiň birleşmeginiň haýwanlaryň ömrüni takmynan 30% uzaldýandygyny anykladylar. Bu barada Nature Aging žurnalynda çap bolan makala salgylanýan EurekAlert ýazýar.
Dermanlaryň her biriniň aýratynlykda az täsirlidigi bellendi: rapamisin ömrüň dowamlylygyny 15-20%, trametinib bolsa 5-10% ýokarlandyrdy.
Utgaşdyrylan bejergi garrap barýan haýwanlaryň saglygyna hem oňyn täsir etdi. Dermanlary alan syçanlaryň dokumalarynda we beýnilerinde dowamly çişmegiň alamatlary azdy. Mundan başga-da, olarda çiş döremek ähtimallygy azdy.
Rapamisin we trametinib - bular düwnük keselini bejermek üçin ulanylýan dermanlardyr. Olaryň işleýiş mehanizmi tapawutly. Rapamisiniň geroprotektiki häsiýete eýedigi öňem mälimdi, ýagny ol garramagy haýalladyp bilýärdi. Emma trametinibde şeýle häsiýetleriň bardygy ilkinji gezek anyklandy.
Alymlar dermanlaryň bilelikde gen işjeňligine täsir edýändigini anykladylar. Şonda goşmaça zyýanly täsirleri tapylmady.
Indi barlagçylar kliniki synaglary adamlarda geçirmegi meýilleşdirýärler. Iki derman hem lukmançylykda ulanmak üçin eýýäm tassyklandy. Alymlar indi ygtybarly we täsirli dozany kesgitlemeli.
"Mundan buýana adamlarda geçiriljek barlaglar bu derman serişdeleriniň nähili peýdasynyň bardygyny we kime peýdaly bolup biljekdigini görkezer" -diýip, Maks Plankyň Garramagyň biologiýasy institutynyň genetiki we müdiri Linda Partrij belleýär.
